ಜಗತ್ತು ಮತ್ತೊಂದು ಮಹಾಯುದ್ಧದ ಹೊಸ್ತಿಲಲ್ಲಿ ನಿಂತಿದೆಯೇ? ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷ ತಾರಕಕ್ಕೇರಿದೆ, ಇಡೀ ವಿಶ್ವದ ಕಣ್ಣು ಈಗ ‘ಹಾರ್ಮುಜ್ ಜಲಸಂಧಿ‘ (Strait of Hormuz) ಮೇಲೆ ನೆಟ್ಟಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೀಡಿದ್ದ 48 ಗಂಟೆಗಳ ಖಡಕ್ ಎಚ್ಚರಿಕೆಯ ನಂತರ, ಜಗತ್ತು ಉಸಿರು ಬಿಗಿಹಿಡಿದು ಕಾಯುತ್ತಿರುವಾಗಲೇ ಟ್ರಂಪ್ ಅನಿರೀಕ್ಷಿತವಾಗಿ ‘5 ದಿನಗಳ ಕದನ ವಿರಾಮ’ ಘೋಷಿಸುವ ಮೂಲಕ ರಣತಂತ್ರದ ಹೊಸ ದಾಳ ಉರುಳಿಸಿದ್ದಾರೆ.
48 ಗಂಟೆಗಳ ಡೆಡ್ಲೈನ್ ಮತ್ತು ಟ್ರಂಪ್ ಬೆದರಿಕೆ
ಕಳೆದ ಕೆಲವು ದಿನಗಳಿಂದ ಇರಾನ್, ಜಗತ್ತಿನ ಪ್ರಮುಖ ತೈಲ ಸಾಗಾಣಿಕಾ ಮಾರ್ಗವಾದ ಹಾರ್ಮುಜ್ ಜಲಸಂಧಿಯನ್ನು ಬಂದ್ ಮಾಡಿತ್ತು. ಇದರಿಂದ ಜಾಗತಿಕ ಇಂಧನ ಮಾರುಕಟ್ಟೆಯಲ್ಲಿ ತಲ್ಲಣ ಸೃಷ್ಟಿಯಾಗಿತ್ತು. ಇದಕ್ಕೆ ತೀವ್ರವಾಗಿ ಪ್ರತಿಕ್ರಿಯಿಸಿದ್ದ ಅಧ್ಯಕ್ಷ ಟ್ರಂಪ್, “ಮುಂದಿನ 48 ಗಂಟೆಗಳ ಒಳಗೆ ಹಾರ್ಮುಜ್ ಜಲಸಂಧಿಯನ್ನು ತೆರೆಯದಿದ್ದರೆ, ಇರಾನ್ನ ವಿದ್ಯುತ್ ಸ್ಥಾವರಗಳು ಮತ್ತು ಪ್ರಮುಖ ಕೇಂದ್ರಗಳನ್ನು ಧೂಳೀಪಟ ಮಾಡಲಾಗುವುದು” ಎಂದು ನೇರ ಯುದ್ಧದ ಬೆದರಿಕೆ ಹಾಕಿದ್ದರು.
ಟ್ರಂಪ್ ಅವರ ಡೆಡ್ಲೈನ್ ಮುಗಿಯುತ್ತಾ ಬಂದರೂ ಇರಾನ್ ತನ್ನ ಪಟ್ಟು ಸಡಿಲಿಸಲಿಲ್ಲ. ಅಮೆರಿಕದ ಬೆದರಿಕೆಗೆ ಜಗ್ಗದ ಇರಾನ್, ತನ್ನ ರಕ್ಷಣಾ ವ್ಯವಸ್ಥೆಯನ್ನು ಸನ್ನದ್ಧಗೊಳಿಸಿತ್ತು. ಅಮೆರಿಕದ ಯುದ್ಧ ನೌಕೆಗಳು ಇರಾನ್ ಸಮೀಪದ ಸಮುದ್ರದಲ್ಲಿ ಬೀಡು ಬಿಟ್ಟಿದ್ದರಿಂದ, ಯಾವುದೇ ಕ್ಷಣದಲ್ಲಿ ಕ್ಷಿಪಣಿ ದಾಳಿ ನಡೆಯಬಹುದು ಎಂಬ ಆತಂಕ ಮನೆಮಾಡಿತ್ತು. ಒಂದು ವೇಳೆ ದಾಳಿ ನಡೆದಿದ್ದರೆ, ಅದು ಕೇವಲ ಎರಡು ದೇಶಗಳ ನಡುವಿನ ಸಂಘರ್ಷವಾಗಿ ಉಳಿಯದೆ ಜಾಗತಿಕ ಬಿಕ್ಕಟ್ಟಾಗಿ ಮಾರ್ಪಡುವ ಸಾಧ್ಯತೆ ಇತ್ತು.
ಕದನ ವಿರಾಮದ ಹಿಂದಿನ ರಹಸ್ಯವೇನು?
ದೊಡ್ಡ ಪ್ರಮಾಣದ ದಾಳಿ ನಡೆಯಲಿದೆ ಎಂದು ವಿಶ್ಲೇಷಕರು ಊಹಿಸುತ್ತಿದ್ದಾಗಲೇ, ಟ್ರಂಪ್ 5 ದಿನಗಳ ಕದನ ವಿರಾಮ ಘೋಷಿಸಿರುವುದು ಅಚ್ಚರಿ ಮೂಡಿಸಿದೆ. ಇದರ ಹಿಂದೆ ಹಲವು ರಾಜತಾಂತ್ರಿಕ ಕಾರಣಗಳಿರಬಹುದು ಎಂದು ಅಂದಾಜಿಸಲಾಗಿದೆ:
ರಾಜತಾಂತ್ರಿಕ ಮಾತುಕತೆ: ಯುದ್ಧದ ಬದಲು ಶಾಂತಿಯುತವಾಗಿ ಜಲಸಂಧಿಯನ್ನು ತೆರೆಯಲು ಇರಾನ್ಗೆ ಕೊನೆಯ ಅವಕಾಶ ನೀಡುವುದು.
ಜಾಗತಿಕ ಒತ್ತಡ: ವಿಶ್ವಸಂಸ್ಥೆ ಮತ್ತು ಮಿತ್ರ ರಾಷ್ಟ್ರಗಳ ಮನವಿಗೆ ಓಗೊಟ್ಟು ತಾತ್ಕಾಲಿಕವಾಗಿ ದಾಳಿಯನ್ನು ಮುಂದೂಡಿರುವುದು.
ತೈಲ ಮಾರುಕಟ್ಟೆ ಸ್ಥಿರತೆ: ತಕ್ಷಣದ ದಾಳಿಯಿಂದ ತೈಲ ಬೆಲೆಗಳು ಗಗನಕ್ಕೇರಿ ಅಮೆರಿಕದ ಆರ್ಥಿಕತೆಯ ಮೇಲೆ ಹೊಡೆತ ಬೀಳುವುದನ್ನು ತಪ್ಪಿಸುವ ತಂತ್ರ.
ಇದನ್ನೂ ಓದಿ | ಕೆಎಸ್ಪಿಸಿಬಿ ಲ್ಯಾಪ್ಟಾಪ್ ಹಗರಣ: 72 ಸಾವಿರದ ಲ್ಯಾಪ್ಟಾಪ್ಗೆ 1.17 ಲಕ್ಷ ಪಾವತಿ!
ಬೆಂಗಳೂರಿನ ಮೇಲಾಗುವ ಪರಿಣಾಮ!
ಈಗಾಗಲೇ ಎಲ್ಪಿಜಿ ಮತ್ತು ಇಂಧನ ಕೊರತೆಯಿಂದ ಬೆಂಗಳೂರಿನ ಹೋಟೆಲ್ ಉದ್ಯಮ ಸೇರಿದಂತೆ ಹಲವು ವಲಯಗಳು ಸಂಕಷ್ಟದಲ್ಲಿವೆ. ಟ್ರಂಪ್ ಅವರ ಈ 5 ದಿನಗಳ ಕಾಲಾವಕಾಶದಲ್ಲಿ ಇರಾನ್ ಜಲಸಂಧಿಯನ್ನು ಮುಕ್ತಗೊಳಿಸಿದರೆ ಮಾತ್ರ ಜಾಗತಿಕ ಪೂರೈಕೆ ಸರಪಳಿ ಹಳಿಗೆ ಮರಳಲಿದೆ. ಇಲ್ಲವಾದರೆ, ಈ ಕದನ ವಿರಾಮದ ನಂತರ ನಡೆಯಬಹುದಾದ ದಾಳಿ ಜಗತ್ತಿನ ಮೇಲೆ ಭೀಕರ ಪರಿಣಾಮ ಬೀರಲಿದೆ.
ಮುಂದಿನ 5 ದಿನಗಳು ಇಡೀ ವಿಶ್ವದ ಪಾಲಿಗೆ ಅತ್ಯಂತ ನಿರ್ಣಾಯಕವಾಗಿದ್ದು, ಇರಾನ್ ಯಾವ ನಿರ್ಧಾರ ತೆಗೆದುಕೊಳ್ಳಲಿದೆ ಎಂಬುದು ಕುತೂಹಲ ಮೂಡಿಸಿದೆ.
