“ಸುವರ್ಣ”ದಲ್ಲಿ ಬದಲಾವಣೆ “ಕ್ರಾಂತಿ”..!:- ಮ್ಯಾನೇಜ್ಮೆಂಟ್ “ರಂಗಪ್ರವೇಶ”..! ಉಳಿಯೋರು ಯಾರು..?

ಸುವರ್ಣ ನ್ಯೂಸ್(SUVARNA KANNADA NEWS CHANNEL), ಕನ್ನಡದ ಪ್ರತಿಷ್ಟಿತ ನ್ಯೂಸ್ ಚಾನೆಲ್( KANNADA NEWS CHANNELS) ಗಳಲ್ಲೊಂದು.ಆದರೆ ಎಷ್ಟೇ ಶ್ರಮ ಪಟ್ಟರೂ,ಏನೆಲ್ಲಾ ಸಾಹಸ ಮಾಡಿದ್ರೂ,..ಸುದ್ದಿ ಕ್ಷೇತ್ರದಲ್ಲಿ ಘಟಾನುಘಟಿಗಳೆನಿಸಿಕೊಳ್ಳುವ ಪತ್ರಕರ್ತರಿದ್ದರೂ ನಂಬರ್ ಒನ್ ಸ್ಥಾನ ಇಂದಿಗೂ ಅದಕ್ಕೆ  ಗಗನಕುಸುಮ.

ಮಾದ್ಯಮ ಲೋಕದ ದಿಗ್ಗಜ ರಾಜೀವ್ ಚಂದ್ರಶೇಖರ್( RAJIV CHANDRASHEKAR) ಮಾಲೀಕತ್ವದ  ಏಷ್ಯಾ ನೆಟ್ (ASIANET NETWORK) ನೆಟ್ವರ್ಕ್ ಚಾನೆಲ್ ಸುಧಾರಣೆ, ಬೆಳವಣಿಗೆಗೆ ಕೋಟಿಗಳನ್ನು ಸುರಿದ್ರೂ ಟಿಆರ್ ಪಿ ( TRP-TELE RATING POINT)ವಿಷಯದಲ್ಲಿ ಟಿವಿ-9(TV9 KANNADA), ಪಬ್ಲಿಕ್ ಟಿವಿ( PUBLIC TV) ಹತ್ತಿರವೂ ಸುಳಿಯೊಕ್ಕೆ ಸಾಧ್ಯವಾಗಿಲ್ಲ ಎನ್ನುವುದು ವಿಪರ್ಯಾಸವೇ ಸರಿ. ನಿಮಗೆ ನೆನಪಿರಲಿ ಅಂಥಾ ಹೇಳ್ತೇವೆ ಕೇಳಿ,ಬಹುಷಃ ಕನ್ನಡದ ನ್ಯೂಸ್ ಚಾನೆಲ್ ಗಳ ಇತಿಹಾಸದಲ್ಲಿ ಯಾವೊಂದು ಚಾನೆಲ್ ಮಾಡಿರದಷ್ಟು.. ಮಾಡುತ್ತಿರುವಷ್ಟು. ಮಾಡಲಿಕ್ಕಾಗದಷ್ಟು  ಬದಲಾವಣೆ ಏನಾದ್ರೂ ಒಂದು ಚಾನೆಲ್ ನಲ್ಲಿ ನಡೆದಿದೆ ಎಂದ್ರೆ ಅದು ಒನ್ ಅಂಡ್ ಒನ್ಲಿ ಸುವರ್ಣ ನ್ಯೂಸ್ ಚಾನೆಲ್ ಮಾತ್ರ,…

ಹೋಗ್ಲಿ ಲುಕ್ ಮತ್ತು ವಿನ್ಯಾಸದಲ್ಲಿ ಬದಲಾದ ಮೇಲೆಯಾದ್ರೂ ಅದರ ಲಕ್ ಚೇಂಜ್ ಆಯ್ತಾ ಎಂದ್ರೆ ಅದು ಇಲ್ಲಾ..? ಹಾಗಾಗಿನೇ  ಸುವರ್ಣ ಚಾನೆಲ್ ಗೆ ಆರಕ್ಕೇರದ ಮೂರಕ್ಕಿಳಿಯದ ಚಾನೆಲ್ ಎನ್ನುವ  ಮಾತಿದೆ..( ಈ ಮಾತನ್ನು  ಆ  ಚಾನೆಲ್ ನಲ್ಲಿ ಕೆಲಸ ಮಾಡುವ ಮಾದ್ಯಮಮಿತ್ರರು ಕುಹಕಕ್ಕಾಗಲಿ..ವಿಡಂಬನೆಗಾಗಲಿ ಹೇಳುತ್ತಿದ್ದೇವೆ ಎಂದು ಅನ್ಯಥಾ ಭಾವಿಸಬಾರದು).

ಅಜಿತ್ ಹನುಮಕ್ಕನವರ್ ( AJITH HANUMAKKANAVAR) ಅವರಂಥಾ ಸಮರ್ಥ ಸಂಪಾದಕರ ಮಾರ್ಗದರ್ಶನದಲ್ಲಿ ನಡೆಯುತ್ತಿರುವ ಚಾನೆಲ್ ಈಗಾಗ್ಲೇ ಒಂದಷ್ಟು ವರ್ಷಗಳನ್ನು ಪೂರೈಸಿದೆ.ಟಾಪ್ 3 ಚಾನೆಲ್ ಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದೆ. ಕ್ರೈಮ್,ಪಾಲಿಟಿಕ್ಸ್ ( CRIME, POLITICS)ನಲ್ಲಿ ಉಳಿದೆಲ್ಲಾ ಚಾನೆಲ್ ಗಳಿಗಿಂತಲೂ ಮುನ್ನವೇ ಇಲ್ಲಿ ಸಾಕಷ್ಟು ಸ್ಪೋಟಕ ಸುದ್ದಿಗಳು ಬ್ರೇಕ್ ಆಗ್ತವೆ.ಅವರೇ ಘೋಷಿಸಿಕೊಂಡಂತೆ ಎಕ್ಸ್ ಕ್ಲ್ಯೂಸಿವ್( EXCLUSIVE) ಸುದ್ದಿಗಳ ಹೆಡ್ ಕ್ವಾರ್ಟರ್ಸ್ ಎಂದೂ ಕರೆಯಿಸಿಕೊಂಡಿದೆ.ಸುದ್ದಿಯಾಳಕ್ಕೆ ಇಳಿದು ಬೇರೆಯವರಿಗೆ ಸಿಗಲಿಕ್ಕೆ ಸಾಧ್ಯವಿರಬಹುದಾದ ಸುದ್ದಿಗಳನ್ನು ಕಾಂಟ್ರಿಬ್ಯೂಟ್ ಮಾಡುವ ಅನುಭವಿ ವರದಿಗಾರರ ಪಡೆಯೂ ಇದೆ.ಆ ವಿಚಾರದಲ್ಲಿ ಯಾವುದೇ ತಕರಾರಿಲ್ಲ.ಆದರೆ ಚಾನೆಲ್ ನ್ನು ಟಾಪ್1- ಅಥವಾ ಟಾಪ್-2  ಸ್ಥಾನಕ್ಕೆ ಕೊಂ ಡೊಯ್ಯುವ ಪ್ರಯತ್ನದಲ್ಲಿ ವಿಫಲವಾಗಿರುವುದು ಮ್ಯಾನೇಜ್ಮೆಂಟನ್ನು ನಿರಂತರವಾಗಿ ಬೇಸರ ಹಾಗೂ ಚಿಂತೆಗೀಡುಮಾಡಿದೆ ಎನ್ನುವುದು ಕೂಡ ಒಪ್ಪಲೇಬೇಕಾದ ಸತ್ಯ..ಇದನ್ನು ಸ್ವತಃ ಸಂಪಾದಕ ಅಜಿತ್ ಹನುಮಕ್ಕನವರ್ ಕೂಡ ಒಪ್ಪಲೇಬೇಕು..

ಅದೇಕೋ ಚಾನೆಲ್ ನಲ್ಲಿ ಇತ್ತೀಚಿನ ಕೆಲ ತಿಂಗಳಿಂದ ಸಿಕ್ಕಾಪಟ್ಟೆ ಬೆಳವಣಿಗೆ-ಬದಲಾವಣೆ ನಡೆಯುತ್ತಲೇ ಇವೆ.ಅವು ಸುದ್ದಿಮನೆಯಲ್ಲಿ ಪ್ರಾಮಾಣಿಕವಾಗಿ  ನಿಷ್ಟೆಯಿಂದ ಕೆಲಸ ಮಾಡುತ್ತಿರುವವರಿಗೆ ಪೂರಕ ಎನಿಸುವಂತದ್ದಾಗಿದಿದ್ದರೆ ಯಾವುದೇ ಸಮಸ್ಯಾತ್ಮಕ ಎನಿಸುತ್ತಿರಲಿಲ್ಲವೇನೋ..? ಆದರೆ ಅದು ಬಹುತೇಕ ಸಿಬ್ಬಂದಿಗೆ  ಕಿರಿಕಿರಿ-ಗೊಂದಲ-ಅತಂತ್ರಗೊಳಿಸುವ ಮಟ್ಟದ ಬೆಳವಣಿಗೆಗಳೆನ್ನುವುದು ಗಮನಿಸಬೇಕಾದ ಸಂಗತಿ. ಸ್ಥಾನ-ಹುದ್ದೆ-ಜವಾಬ್ದಾರಿಗಳ ದಿಢೀರ್ ಪಲ್ಲಟ ನಡೆಯುತ್ತಿರುವುದು ಅಲ್ಲಿರುವ ಬಹುತೇಕರನ್ನು ತೀರಾನೇ ಡಿಸ್ಟರ್ಬ್ ಮಾಡಿದೆ ಎನ್ನುವ ಮಟ್ಟದ ಚರ್ಚೆಗಳು ಚಾನೆಲ್ ನೊಳಗೇ ನಡೆಯುತ್ತಿವೆಯಂತೆ.

ಸಂಪಾದಕರಾದ ಅಜಿತ್ ಹನುಮಕ್ಕನವರ್ ಕಾರ್ಯಶೈಲಿಯೇ ಮ್ಯಾನೇಜ್ಮೆಂಟ್ ಗೆ ತೃಪ್ತಿ-ಸಮಾಧಾನಕರ ಎನಿಸಿಲ್ಲ ಎನ್ನುವ ಸ್ಪೋಟಕ ಸುದ್ದಿ ಕೇಳಿಬರುತ್ತಿದೆ.ಸಂಪಾದಕರಾಗಿ ಯಾವುದೇ ಇಸಂ-ಪಂಥ-ಬಣಗಳಿಗೆ ಸೀಮಿತಗೊಳಿಸಿಕೊಳ್ಳಬಾರದಿದ್ದರೂ ಅನೇಕ “ಧಾರ್ಮಿಕ” ಹಾಗೂ ರಾಜಕೀಯ ವಿಚಾರಗಳಲ್ಲಿ ಒಂದು ವರ್ಗದ ಪರ ವಕ್ತಾರನಂತೆ ನಿಂತು ಕೆಲಸ ಮಾಡಿದ್ದಾರೆನ್ನುವ ಮಾಹಿತಿ ಬೇರ್ಯಾರು ಅಲ್ಲ,ಅದೇ ಚಾನೆಲ್ ನಲ್ಲಿ ಆಯಕಟ್ಟಿನ ಹುದ್ದೆಗಳಲ್ಲಿ ಕೆಲಸ ಮಾಡುತ್ತಿರುವ ಅನೆಕರಿಂದ ಮ್ಯಾನೇಜ್ಮೆಂಟ್ ಗೆ ತಲುಪಿದೆಯಂತೆ. ಇದರಿಂದ ನಖಶಿಖಾಂತ ಉರಿದು ಹೋಗಿರುವ ಚಾನೆಲ್ ನ ಕೇರಳಾದ ಆಡಳಿತ  ಮಂಡಳಿ ಅಜಿತ್ ವಿಚಾರದಲ್ಲಿ ಅತ್ಯಂತ ಕಟ್ಟುನಿಟ್ಟಿನ ನಿರ್ದಾರವೊಂದನ್ನು ತೆಗೆದುಕೊಳ್ಳಲು ಚಿಂತನೆ ನಡೆಸುತ್ತಿದೆ ಎನ್ನುವ ವರ್ತಮಾನವಿದೆ ಎನ್ನಲಾಗುತ್ತಿದೆ.ಆ ನಿರ್ದಾರ ಅಜಿತ್ ಹನುಮಕ್ಕನವರ್ ಅವರ ಪತ್ರಿಕೋದ್ಯಮ ವೃತ್ತಿಯ ಭವಿಷ್ಯವನ್ನೇ ನಿರ್ದರಿಸಬಲ್ಲದು ಎನ್ನುತ್ತಿರುವುದು ಮತ್ತಷ್ಟು ಕುತೂಹಲ-ಶಂಕೆ ಮೂಡಿಸಿದೆ.

ಜಾಹಿರಾತು ನಿಂತಿದ್ದಕ್ಕೆ ಆಕ್ರೋಶ..!!? : ಸಾಕಷ್ಟು ಜನರಿಗೆ ಈ ವಿಷಯ ತಿಳಿದಿರಲಿಕ್ಕಿಲ್ಲವೇನೋ ಅನ್ನಿಸುತ್ತೆ..ಹೀಗೊಂದು ಮಾತು ಕೂಡ ಚಾನೆಲ್ ನಲ್ಲಿ ಹರಿದಾಅಡುತ್ತಿದೆ..ಕೆಲ ತಿಂಗಳುಗಳ ಹಿಂದೆ ಒಂದಷ್ಟು ಸಮಯ, ಸುವರ್ಣ ಟಿವಿಗೆ ಕಾಂಗ್ರೆಸ್ ಸರ್ಕಾರ ಜಾಹಿರಾತು ಕೊಡುವುದನ್ನೇ ನಿಲ್ಲಿಸಿತ್ತಂತೆ…ಇದಕ್ಕೆ ಕಾರಣ, ಸಂಪಾದಕೀಯದಲ್ಲಿದ್ದ ಕೆಲವರ ಜತೆ ಸರ್ಕಾರ ಮತ್ತು ಅದು ಪ್ರತಿನಿಧಿಸುವ ಪಕ್ಷದಲ್ಲಿದ್ದ ಕೆಲವರ ನಡುವೆ  ಇದ್ದ ಹಗ್ಗಜಗ್ಗಾಟವಂತೆ..ತಮ್ಮ ಸರ್ಕಾರ ಮತ್ತು  ಪಕ್ಷದ ಬಗ್ಗೆ ಇಲ್ಲಸಲ್ಲದ ಆಪಾದನೆ ಮಾಡಿ, ಜನರಲ್ಲಿ ದ್ವೇಷ-ಅಸಹನೆ-ದ್ವೇಷದ ಭಾವನೆ ತುಂಬಲಾಗ್ತಿದೆ ಎನ್ನುವ ಕೋಪಕ್ಕೆ ಆ ಪಕ್ಷ ಸುವರ್ಣ ಚಾನೆಲ್ ಗೆ ಒಂದಷ್ಟು ದಿನ ಜಾಹಿರಾತು ಕೊಡುವುದನ್ನೇ ನಿಲ್ಲಿಸಿತ್ತಂತೆ.ವಿಚಿತ್ರ ಹಾಗೂ ಆಶ್ಚರ್ಯ ಏನೆಂದರೆ ಈ ವಿಷಯವೇ ಮ್ಯಾನೇಜ್ಮೆಂಟ್ ಗಮನಕ್ಕೆ ಬಂದಿರಲಿಲ್ಲವಂತೆ.ಇದರಿಂದ ಅಜಿತ್ ಹನುಮಕ್ಕನವರ್ ಹಾಗೂ ಸಂಪಾದಕೀಯದ ಮೇಲೆ ಗರಂ ಆಗಿ ತೀವ್ರ ತರಾಟೆ್ಗೆ ತೆಗೆದುಕೊಂಡಿತ್ತಂತೆ. ರಾಜೀವ್ ಚಂದ್ರಶೇಖರ್ ಅವರು ಬಿಜೆಪಿ ಮುಖಂಡರಾಗಿದ್ರೂ, ಯಾವುದೇ ಸನ್ನಿವೇಶದಲ್ಲೂ ಬಿಜೆಪಿಗೆ ಫೇವರ್ ಆಗುವಂತೆ ಏಷಿಯಾನೆಟ್ ಚಾನೆಲ್ ನ್ನು ಕೇರಳಾದಲ್ಲಿ ಬಳಸಿಕೊಂಡಿಲ್ಲ.ಹಾಗೆ ಮಾಡಿ ಎಂದು ಎಂದಿಗೂ ಆದೇಶಿಸಿಲ್ಲ..ಹಾಗೊಂದು ನಿಷ್ಪಕ್ಷಪಾತ ವ್ಯವಸ್ಥೆ ನಡೆದುಕೊಂಡು ಬಂದಿರುವುದರಿಂದಲೇ ಚಾನೆಲ್ ಗೆ ಒಳ್ಳೆಯ ರೆಪ್ಯೂಟೇಷನ್ ಇದೆ.ಆದರೆ ಕರ್ನಾಟಕದಲ್ಲಿ ಒಂದು ಪಕ್ಷವನ್ನು ಓಲೈಸ್ಲಿಕ್ಕಾಗಿ ಇನ್ನೊಂದು ಪಕ್ಷವನ್ನು ಡಮ್ಮಿ ಮಾಡುವುದು ಎಷ್ಟು ಸರಿ..? ಇಂತದ್ದೊಂದು ಅಚಾತುರ್ಯವನ್ನು ಮ್ಯಾನೇಜ್ಮೆಂಟ್ ಸಹಿಸುವುದಿಲ್ಲ..? ಹುಷಾರ್ ಎಂದು ಎಚ್ಚರಿಸಿ-ಅಬ್ಬರಿಸಿತ್ತೆನ್ನುವುದು ದೊಡ್ಡ ಸುದ್ದಿಯಾಗಿತ್ತು.

ಚಾನೆಲ್ ನಲ್ಲಿ ಪ್ರಸಾರವಾಗುವ ಪ್ರತಿ ಸುದ್ದಿಯ ವಿಚಾರಗಳು ತನ್ನ ಗಮನಕ್ಕೆ ಬರಲೇಬೇಕೆಂದು  ಮ್ಯಾನೇಜ್ಮೆಂಟ್ ನಿರೀಕ್ಷಿಸೋದು ಸಹಜ..ಅದು ಸಂಪಾದಕೀಯದ ಬದ್ಧತೆ ಹಾಗು ಹೊಣೆಗಾರಿಕೆಯೂ ಹೌದು.ಆದರೆ ಕೆಲವೊಂದು ನಿರ್ಣಾಯಕ ಎನ್ನುವಂತ ಸನ್ನಿವೇಶಗಳಲ್ಲಿ ಸಂಪಾದಕೀಯತನಗನ್ನಿಸಿದ ಸ್ಟ್ಯಾಂಡ್ ತೆಗೆದುಕೊಂಡಿದೆ ಎನ್ನುವುದು ಮ್ಯಾನೇಜ್ಮೆಂಟ್ ನ ಆಪಾದನೆಯಂತೆ.ಇದು ಚಾನೆಲ್ ನ ಪ್ರತಿಷ್ಟೆ-ಗೌರವಕ್ಕೆ ಧಕ್ಕೆ ತಂದಿದೆಯಂತೆ.ಇದರ ಬಗ್ಗೆ ಮ್ಯಾನೇಜ್ಮೆಂಟ್ ನ ಸಿದ್ದಾಂತ ಹಾಗು ಬದ್ಧತೆಯನ್ನೇ ಪ್ರಶ್ನೆ ಮಾಡಿ ಮಾತನಾಡುವಂತಾಗಿದೆಯಂತೆ.ಹಾಗಾಗಿನೇ ಇಷ್ಟು ವರ್ಷ ಆಗಿದ್ದು ಸಾಕು.ಅದರಿಂದ ಚಾನೆಲ್ ಗೆ ಆದ ಪ್ರಯೋಜನವೂ ಸಾಕು..ನೀವು ಮಾಡಿದ ಮಹಾಉಪಕಾರವೂ ಸಾಕು..ಇನ್ಮುಂದೆ ಚಾನೆಲ್ ನ್ನು ನಾವು ನಡೆಸ್ತೇವೆ..ಪ್ರತಿಯೊಂದು ನಿರ್ದಾರಗಳು ನಿಮ್ಮದಲ್ಲ..ನಮ್ಮದಾಗಲಿವೆ ಎಂದು ಎಚ್ಚರಿಕೆ ಕೊಟ್ಟಿದ್ದಾರೆನ್ನಲಾಗ್ತಿದೆ. ಕೇರಳಾದಲ್ಲಿ ಯಾವುದೇ ಚಾನೆಲ್ ಗಳು ಇರಲಿ..ಬರಲಿ.ಇಂದಿಗೂ ಏಷಿಯಾ ನೆಟ್ ನಂಬರ್ ಒನ್ ಚಾನೆಲ್ ಆಗಿ ತನ್ನ ಸ್ಥಾನ-ಪ್ರತಿಷ್ಟೆ-ವಿಶ್ವಾಸಾರ್ಹತೆಯನ್ನು ಅಬಾಧಿತಗೊಳಿಸಲಿಕ್ಕೆ ಮುಖ್ಯ ಕಾರಣವೇ ನಿಷ್ಪಕ್ಷಪಾತತನ..ಅದನ್ನು ಕರ್ನಾಟಕದಲ್ಲಿ ಹಾಳು ಮಾಡಲಾಗ್ತಿದೆ..ಅದಕ್ಕೆ ಕಡಿವಾಣ ಹಾಕದಿದ್ರೆ ಸಂಪೂರ್ಣ ಮುಳುಗಿ ಹೋಗ್ತೇವೆನ್ನುವ ಆತಂಕ ಕಾಡುತ್ತಿರುವುದರಿಂದಲೇ ಒಂದು ಸಮಗ್ರ-ಅಮೂಲಾಗ್ರ ಬದಲಾವಣೆಗೆ  ಕೈ ಹಾಕಲು ಮುಂದಾಗಿದೆಯಂತೆ..ಮ್ಯಾನೇಜ್ಮೆಂಟ್ ನ ಈ ನಿರ್ದಾರವೇ ಇದೀಗ ಸುವರ್ಣ ಚಾನೆಲ್ ನ ಸುದ್ದಿಮನೆಯಲ್ಲಿ ಕುತೂಹಲ-ಆತಂಕ ಎರಡನ್ನೂ ಸೃಷ್ಟಿಸಿದೆಯಂತೆ.

ಧರ್ಮಸ್ಥಳ( DHARMASTHALA CONTROVERSY) ದ ವಿಚಾರದಲ್ಲಿ ಸಂಪಾದಕೀಯದ ಧೋರಣೆ ಬಗ್ಗೆಯೂ  ಮ್ಯಾನೇಜ್ಮೆಂಟ್ ಗೆ ಅಸಮಾಧಾನ..!: ಧರ್ಮಸ್ಥಳದ ಬುರುಡೆ ಪ್ರಕರಣದ  ವಿಚಾರದಲ್ಲಿ ಸುವರ್ಣ ನ್ಯೂಸ್ ಎಕ್ಸ್ ಕ್ಲ್ಯೂಸಿವ್ ನ್ಯೂಸ್ ಗಳ ಮೇಲೆ ಎಕ್ಸ್ ಕ್ಲ್ಯೂಸಿವ್ ನ್ಯೂಸ್ ಬ್ರೇಕ್ ಮಾಡಿದ್ದು-ಪ್ರಸಾರ ಮಾಡಿದ್ದನ್ನು ನೋಡಿದ್ದೇವೆ. ಇನ್ವೆಸ್ಟಿಗೇಟಿವ್ ಜರ್ನಲಿಸಂ ಎನ್ನೋದೇ ಸತ್ತು ಹೋಗ್ತಿರುವ ವೇಳೆಯಲ್ಲಿ ಈ ಚಾನೆಲ್ ನ ವರದಿಗಾರರು ಮಾಡಿದ ತನಿಖೆ ಮತ್ತು ಶೋಧನೆ ಪತ್ರಿಕೋದ್ಯಮದ ಘನತೆ ಹಾಗೂ ವಿಶ್ವಾಸಾರ್ಹತೆಗೆ ನಿದರ್ಶನದಂತಿತ್ತು. ಇದನ್ನು ಕನ್ನಡ ಫ್ಲ್ಯಾಶ್ ನ್ಯೂಸ್ ಕೂಡ ಯಾವುದೆ ನಿರ್ಭಿಡೆ-ಸಂಶಯವಿಲ್ಲದೆ ಒಪ್ಪಿಕೊಳ್ಳುತ್ತೆ.ಆದರೆ ಈ ವಿಷಯದಲ್ಲಿ ಮ್ಯಾನೇಜ್ಮೆಂಟ್ ಏಕೋ ಸಮಾಧಾನಗೊಂಡಂತಿರಲಿಲ್ಲವಂತೆ. ಇದಕ್ಕೆ ಕಾರಣ ವಿಷಯವನ್ನು ವಿಷಯವನ್ನಾಗಿಯೇ ನೋಡಬೇಕು..ಅದರಾಚೆ ಹಿತಾಸಕ್ತಿಗಳು ಕೆಲಸ ಮಾಡಬಾರದೆನ್ನುವುದು. ಧರ್ಮಸ್ಥಳದ ವಿಚಾರಕ್ಕೆ ಸಂಬಂಧಿಸಿದಂತೆ ಸಂಪಾದಕೀಯ ತೆಗೆದುಕೊಂಡ ಸ್ಟ್ಯಾಂಡ್..ಅಲ್ಲಿ ನಡೆಯುತ್ತಿದ್ದ ಡಿಬೇಟ್, ಡಿಬೇಟ್ ಗಳಲ್ಲಿ ನಡೆಯುತ್ತಿದ್ದ ಚರ್ಚೆ..ಅಂತಿಮವಾಗಿ ಸಂಪಾದಕೀಯ ತೆಗೆದುಕೊಳ್ಳುತ್ತಿದ್ದ ನಿಲುವು-ನಿರ್ದಾರಗಳು ಏಕಪಕ್ಷೀಯ ಎಂದು ಮ್ಯಾನೇಜ್ಮೆಂಟ್ ಗೆ ಎನಿಸಿದ್ದಿದೆಯಂತೆ. ಧರ್ಮಸ್ಥಳದಂತ ಸೂಕ್ಷ್ಮ ಹಾ್ಗೂ ಸಂವೇದನಾಶೀಲ ವಿಚಾರದಲ್ಲಿ ಸಂಪಾದಕೀಯ ವರ್ತಿಸಿದ ರೀತಿಗೆ ಅಸಮಾಧಾನಗೊಂಡಿದೆ ಎನ್ನಲಾಗಿರುವ ಮ್ಯಾನೇಜ್ಮೆಂಟ್, ಇಂಥದ್ದೆಲ್ಲಾ ಮರುಕಳಿಸದಂತಾಬೇಕಾದ್ರೆ ಬೆಂಗಳೂರು ಕಚೇರಿಯಲ್ಲಿ ಕುತ್ಕೊಂಡು ತಮ್ಮ ಮೂಗಿನ ನೇರಕ್ಕೆ ಸುದ್ದಿಯನ್ನು ಆಯ್ಕೆ ಮಾಡಿಕೊಂಡು, ಜನಾಭಿಪ್ರಾಯ ರೂಪಿಸಲು ಪ್ರಯತ್ನಿಸುತ್ತಿರುವಂತವರಿಗೆ ಕಡಿವಾಣ ಹಾಕಲೇಬೇಕಿದೆ ಎನ್ನುವ ನಿರ್ದಾರಕ್ಕೆ ಬಂದಿಯೇ ಅಖಾಡಕ್ಕಿಳಿಯೊಕ್ಕೆ ನಿರ್ದರಿಸಿದೆ ಎನ್ನುವ ಮಾತು ಬಲವಾಗಿ ಕೇಳಿಬರುತ್ತಿದೆ.

ಚಾನೆಲ್ ನ ಕೇರಳಾ ಮ್ಯಾನೇಜ್ಮೆಂಟ್ ಸುವರ್ಣ ಚಾನೆಲ್ ನ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಲು ನಿರ್ದರಿಸಿಯೇ ಬಿಟ್ಟಿದೆಯಂತೆ.ಕೆಲವರು ತಮ್ಮ ಸ್ವಾರ್ಥಕ್ಕಾಗಿ ಚಾನೆಲ್ ಗುಡ್ ವಿಲ್ ಹಾಳು ಮಾಡುವಂತ ಕೆಲಸ ಮಾಡಿರುವುದನ್ನು ಮ್ಯಾನೇಜ್ಮೆಂಟ್ ಗಮನಿಸಿದೆಯಂತೆ. ಅನೇಕ ವರ್ಷಗಳಿಂದಲೂ ಒಂದೇ ಕಡೆ ಗೂಟಾ ಹೊಡೆದುಕೊಂಡಿರುವವರ ಸ್ಥಾನ ಪಲ್ಲಟಕ್ಕೆ ನಿರ್ದರಿಸಿದೆಯಂತೆ. ಚಾನೆಲ್ ನಲ್ಲಿ ಸೃಷ್ಟಿಯಾಗಿರುವ ಗುಂಪುಗಾರಿಕೆ-ಪ್ರಾದೇಶಿಕತೆ-ಜಾತೀಯತೆಗೆ ಕೆಂಡಾಮಂಡಲವಾಗಿದೆಯಂತೆ. ಇಂಥಾ ವ್ಯವಸ್ಥೆಗಳಿಂದಲೇ ಚಾನೆಲ್  ಹಾಗೂ ಸಿಬ್ಬಂದಿಯಲ್ಲಿ ಪ್ರೊಫೆಷಿನಲಿಸಂ ನಾಶವಾಗ್ತಿದೆ ಎಂದು ಗುಡುಗಿರುವ ಮ್ಯಾನೇಜ್ಮೆಂಟ್ ಅಜಿತ್  ಹನುಮಕ್ಕನವರ್ ಹಾಗೂ ಆಯಕಟ್ಟಿನ ಹುದ್ದೆಯಲ್ಲಿರುವವರ ಅಧಿಕಾರ ಕಡಿತ ಮಾಡಬೇಕೆಂಬ ಪ್ಲ್ಯಾನ್ ರೂಪಿಸಿಕೊಂಡಿದೆ ಎನ್ನುವ ಮಾತು ಬಲವಾಗಿ ಕೇಳಿಬರುತ್ತಿದೆ.

ಚಾನೆಲ್ ನಲ್ಲಿ ಏನಾಗಬಹುದು..ಯಾರ್ಯಾರ ಸ್ಥಾನ ಪಲ್ಲಟವಾಗಬಹುದು:ಪ್ರಶ್ನೆ ಕಾಡುತ್ತಿರುವುದೇ ಇಲ್ಲಿ.ಬದಲಾವಣೆ ಆಗಲೇಬೇಕೆಂದು ತೀರ್ಮಾನಿಸಿದಂತಿರುವ ಮ್ಯಾನೇಜ್ಮೆಂಟ್ ಬೆಂಗಳೂರು ಕಚೇರಿಯನ್ನು ಲಾಸ್ಟ್ ಟಾರ್ಗೆಟ್ ಮಾಡಿಕೊಂಡಿದೆಯಂತೆ.ಮೊದಲು ಜಿಲ್ಲೆಗಳನ್ನು ಆಯ್ಕೆ ಮಾಡಿಕೊಂಡಿದೆಯಂತೆ.ಹತ್ತುಹದಿನೈದು ವರ್ಷಗಳಿಂದಲೂ ಇದ್ದ ಕಡೆಯೇ ಬೇರು ಬಿಟ್ಟಿರುವ ವರದಿಗಾರರಿಂದ ಚಾನೆಲ್ ಗೆ ಹೇಳಿಕೊಳ್ಳುವಂಥ ಸ್ಪೋಟಕ ಸುದ್ದಿಗಳು ಬರುತ್ತಿಲ್ಲ ಎನ್ನುವ ದೂರಿನ ಹಿನ್ನಲೆಯಲ್ಲಿ ಆರಂಭದಲ್ಲಿ ಪ್ರಾಯೋಗಿಕವಾಗಿ 6-8 ಜಿಲ್ಲೆಗಳ ವರದಿಗಾರರನ್ನು ಒಂದು ಕಡೆಯಿಂದ ಇನ್ನೊಂದು ಕಡೆ ಬದಲಿಸಲು ಮುಂದಾಗಿದೆಯಂತೆ.ಈ ಬಗ್ಗೆ ಈಗಾಗಲೇ ವರದಿಗಾರರಿಗೆ ಮಾಹಿತಿಯು ರವಾನೆಯಾಗಿದೆಯಂತೆ.ಕೆಲವರು ಇದಕ್ಕೆ ವಿರೋಧ ವ್ಯಕ್ತಪಡಿಸಿದ್ರೆ ಇನ್ನು ಕೆಲವರು ಅನಿವಾರ್ಯವಾಗಿ ತೆರಳಲು ನಿರ್ದರಿಸಿದ್ದಾರಂತೆ. ಯಾರು ಒಪ್ಪಲು ಸಿದ್ದವಿಲ್ಲವೋ ಅವರಿಗೆ ಗೇಟ್ ಪಾಸ್ ಕೊಡುವ ಪ್ಲ್ಯಾನ್ ಮ್ಯಾನೇಜ್ಮೆಂಟ್ ನದ್ದು ಎನ್ನುವ ಮಾತಿದೆ.ನಂತರ 1 ಎಂಬಿ ಹಾಗೂ 2 ಎಂಬಿ ಸೆಂಟರ್ ಗಳ ವರದಿಗಾರರನ್ನು ಬದಲಿಸುವ ನಿಟ್ಟಿನಲ್ಲಿಯೂ ಆಲೋಚನೆ ನಡೆಯುತ್ತಿದೆಯಂತೆ. ಈ ಟಾಸ್ಕ್ ನಲ್ಲಿ ಎಷ್ಟ್ ಜನ ಇರುತ್ತಾರೋ..ಹೊರ ಹೋಗುತ್ತಾರೋ ಎನ್ನುವುದು ಗೊತ್ತಾಗುತ್ತಿಲ್ಲ.ಆದರೆ ಜಿಲ್ಲಾ ವರದಿಗಾರರ ವಿಚಾರದಲ್ಲಿ ಮ್ಯಾನೇಜ್ಮೆಂಟ್ ಇಂತದ್ದೊಂದು ನಿರ್ದಾರ ಕೈಗೊಂಡಿದೆ ಎನ್ನುವುದು  ಬಹುತೇಕ ಸತ್ಯ.

ಬೆಂಗಳೂರಿನ ಕಚೇರಿಯಲ್ಲಿ ಏನಾಗಲಿದೆ..? ಚಾನೆಲ್ ನ್ನು ಮ್ಯಾನೇಜ್ಮೆಂಟ್ ಬಹುತೇಕ ಕಂಟ್ರೋಲ್ ಗೆ ತೆಗೆದುಕೊಂಡು ಬದಲಾವಣೆಗೆ ಮುಂದಾಗಿದೆ ಎನ್ನುವುದು ಹೆಚ್ಚು ಆತಂಕ ಮೂಡಿಸಿರುವುದು ಬೆಂಗಳೂರು ಕಚೇರಿಯಲ್ಲಿ ಕೆಲಸ ಮಾಡುವ ಮಾದ್ಯಮಮಿತ್ರರಿಗೆ. ಮ್ಯಾನೇಜ್ಮೆಂಟ್ ನ ಕೆಂಗಣ್ಣಿಗೆ ಯಾರ್ಯಾರು ಬೀಳಲಿದ್ದಾರೆ..ಯಾರು ಬಚಾವಾಗಲಿದ್ದಾರೆ ಎನ್ನುವ ,ಲೆಕ್ಕಾಚಾರ ಬೇರೆ ಶುರುವಾಗಿದೆ.ಕೆಲಸ ಮಾಡದೆ ಕೇವಲ ಬಕೆಟ್ ಇಟ್ಕೊಂಡು ದಿನ ದೂಡುತ್ತಿರುವ, ಟೈಮ್ ನೋಡಿಕೊಂಡು ಕೆಲಸ ಮಾಡುವ, ಚಾನೆಲ್ ಗೆ ಸುದ್ದಿ ಹಾಗೂ ಟಿ.ಆರ್ ಪಿ ವಿಷಯದಲ್ಲಿ ಏನೂ ಪ್ರಯೋಜನವಾಗದೆ ಇರುವ ಸಿಬ್ಬಂದಿಗೆ ಗೇಟ್ ಪಾಸ್ ಕೊಡಲು ನಿರ್ದರಿಸಲಾಗಿದೆ ಎನ್ನುವ ಮಾತುಗಳಿವೆ.ಆದರೆ ಪ್ರಾಮಾಣಿಕವಾಗಿ, ಕೊಟ್ಟ ಕೆಲಸವನ್ನು ಶೃದ್ಧೆ-ಬದ್ಧತೆಯಿಂದ ಕೆಲಸ ಮಾಡುತ್ತಿರುವ ಮಾದ್ಯಮಮಿತ್ರರಿಗೆ ಯಾವುದೇ ರೀತಿಯ ಸಮಸ್ಯೆಗಳಾಗುವುದಿಲ್ಲ ಎಂದೇಳಿದೆಯಂತೆ. ಮ್ಯಾನೇಜ್ಮೆಂಟ್ ನ ಈ ನಿರ್ದಾರ ಸಾಕಷ್ಟು ಜನರಿಗೆ ನುಂಗಲಾಗರದ ತುಪ್ಪವಾಗಿ ಪರಿಣಮಿಸಿದೆಯಂತೆ.