ಭೂಮಿಯ ಮೇಲಿನ ಅತ್ಯಂತ ಬೆಲೆಬಾಳುವ ಆಸ್ತಿ ಯಾವುದಾದರೂ ಇದ್ದರೆ ಅದು ಕೇವಲ ‘ವಿದ್ಯೆ’ ಮಾತ್ರ. ಯಾರು ಎಷ್ಟೇ ಕದ್ದರೂ ಕರಗದ, ಹಂಚಿದಷ್ಟು ಹೆಚ್ಚಾಗುವ ಈ ಜ್ಞಾನಭಂಡಾರಕ್ಕೆ ಒಲಿದವರನ್ನು ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ. ಈ ಮಾತಿಗೆ ಅಕ್ಷರಶಃ ಜೀವಂತ ಉದಾಹರಣೆಯಾಗಿ ನಿಂತಿದ್ದಾರೆ ಕೇವಲ 25 ವರ್ಷದ ಯುವಕ, “ಸುಮಂತ್ ಮಂಜುನಾಥ್ ನಾಯ್ಕ್”. ಇವರ ಸಾಧನೆ ಯುವಜನತೆಯಲ್ಲಿ ಹೊಸದೊಂದು ಭರವಸೆಯ ಕಿಡಿ ಹೊತ್ತಿಸುವಂತಿದೆ.
ಉತ್ತರ ಕನ್ನಡ ಜಿಲ್ಲೆಯ ಶಿರಸಿ ತಾಲೂಕಿನ ಹೆಗಡೆ ಕಟ್ಟಾ ಮೂಲದ ಸುಮಂತ್ ಅವರ ಹಿನ್ನೆಲೆಯೇ ಒಂದು ಕಾನೂನಿನ ಪಾಠಶಾಲೆ ಇದ್ದಂತೆ. ಇವರ ತಂದೆ ಮಂಜುನಾಥ್ ನಾಯ್ಕ್ ಅವರು ಲೋಕಾಯುಕ್ತದ ಸರ್ಕಾರಿ ಅಭಿಯೋಜಕರು (Public Prosecutor). ತಾಯಿ ಸುಜಾತ ನಾಯ್ಕ್ ಅವರು ಕೂಡ ವಕೀಲ ವೃತ್ತಿಯಲ್ಲಿ ತಮ್ಮನ್ನು ತಾವು ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದಾರೆ. ಇಂತಹ ಕಾನೂನು ದಿಗ್ಗಜರ ಮನೆಯಲ್ಲಿ ಬೆಳೆದ ಸುಮಂತ್, ಈಗ ಕೇವಲ 25ನೇ ವಯಸ್ಸಿಗೆ ಸಿವಿಲ್ ನ್ಯಾಯಾಧೀಶರಾಗಿ ನೇಮಕಗೊಳ್ಳುವ ಮೂಲಕ ಇಡೀ ರಾಜ್ಯವೇ ತಮ್ಮತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ.
ಚೆಸ್ ಆಟಗಾರನ ಸಾಧನೆಯ ಹಾದಿ:
ವಿಶೇಷವೆಂದರೆ, ಸುಮಂತ್ ಅವರು ಕೇವಲ ಪುಸ್ತಕದ ಬದನೆಕಾಯಿಯಲ್ಲ, ವಿದ್ಯೆಯನ್ನು ಅಂಕಗಳಿಗಿಂತ ಹೆಚ್ಚಾಗಿ ‘ಜ್ಞಾನ’ ಎಂದು ಪರಿಗಣಿಸಿದವರು. ಇವರು ರಾಜ್ಯ ಮಟ್ಟದ ಚೆಸ್ ಆಟಗಾರರು ಕೂಡ ಹೌದು. ಚದುರಂಗದ ಆಟದಲ್ಲಿನ ತಾಳ್ಮೆ, ತಂತ್ರ ಮತ್ತು ಬುದ್ಧಿಮತ್ತೆಯನ್ನು ತಮ್ಮ ಜೀವನದ ಗುರಿ ಮುಟ್ಟಲೂ ಅವರು ಅಳವಡಿಸಿಕೊಂಡಿದ್ದಾರೆ. ಇದರ ಪರಿಣಾಮವೇ, 2025ನೇ ಸಾಲಿನ ಕರ್ನಾಟಕ ನ್ಯಾಯಾಂಗ ಪರೀಕ್ಷೆಯಲ್ಲಿ (Civil Judge Exam) ತಮ್ಮ ಮೊದಲನೇ ಪ್ರಯತ್ನದಲ್ಲೇ ರಾಜ್ಯಕ್ಕೆ ದ್ವಿತೀಯ (2nd Rank) ಸ್ಥಾನ ಪಡೆದು ಸಾಧನೆಯ ಶಿಖರವೇರಿದ್ದಾರೆ.
ಯುವಜನತೆಗೆ ಸ್ಫೂರ್ತಿ:
“ವಿದ್ಯೆಯಿಂದ ಏನಾಗುತ್ತದೆ?” ಎಂದು ಅಸಡ್ಡೆ ಮಾಡುವವರಿಗೆ ಸುಮಂತ್ ಅವರ ಯಶಸ್ಸೇ ತಕ್ಕ ಉತ್ತರ. ಯಾವ ನ್ಯಾಯಾಲಯದಲ್ಲಿ ತಮ್ಮ ತಂದೆ-ತಾಯಿ ವಕೀಲರಾಗಿ ನಿಂತು ವಾದ ಮಂಡಿಸುತ್ತಾರೋ, ಇಂದು ಅದೇ ನ್ಯಾಯಾಂಗ ವ್ಯವಸ್ಥೆಯಲ್ಲಿ ಅವರ ಮಗ ನ್ಯಾಯಾಧೀಶರಾಗಿ ಅತ್ಯುನ್ನತ ಸ್ಥಾನ ಅಲಂಕರಿಸುವ ಮಟ್ಟಕ್ಕೆ ಬೆಳೆದು ನಿಂತಿದ್ದಾರೆ. ಕಠಿಣ ಪರಿಶ್ರಮ, ಗುರಿಯ ಮೇಲಿನ ಏಕಾಗ್ರತೆ ಹಾಗೂ ಜ್ಞಾನದ ದಾಹವಿದ್ದರೆ ಯಾವ ವಯಸ್ಸಿನಲ್ಲಾದರೂ ಎಂತಹ ಮೈಲಿಗಲ್ಲನ್ನೂ ತಲುಪಬಹುದು ಎಂಬುದಕ್ಕೆ ಸುಮಂತ್ ಅವರೇ ಸಾಕ್ಷಿ.
