ಕಳೆದ ಹಲವು ವರ್ಷಗಳಿಂದ ಚಿತ್ರರಂಗ ಮತ್ತು ಸೋಷಿಯಲ್ ಮೀಡಿಯಾದಲ್ಲಿ ಸದ್ದು ಮಾಡುತ್ತಿದ್ದ ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ಅವರ ಪ್ರೇಮ ಕಥೆ ಇಂದು ಸುಖಾಂತ್ಯ ಕಂಡಿದೆ. ರಶ್ಮಿಕಾ ಮಂದಣ್ಣ ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಸುದೀರ್ಘವಾದ ಮತ್ತು ಅತ್ಯಂತ ಭಾವನಾತ್ಮಕವಾದ ಪೋಸ್ಟ್ ಹಂಚಿಕೊಳ್ಳುವ ಮೂಲಕ, ವಿಜಯ್ ದೇವರಕೊಂಡ ಅವರನ್ನು ತಮ್ಮ “ಪತಿ” ಎಂದು ಜಗತ್ತಿಗೆ ಪರಿಚಯಿಸಿದ್ದಾರೆ.
ಭಾವನಾತ್ಮಕ ಪೋಸ್ಟ್: ವಿಜ್ಜು ಬಗ್ಗೆ ರಶ್ಮಿಕಾ ಮಾತು
ತಮ್ಮ ಪೋಸ್ಟ್ನಲ್ಲಿ ವಿಜಯ್ ಅವರನ್ನು “ನನ್ನ ಪತಿ” (My Husband) ಎಂದು ಸಂಬೋಧಿಸಿರುವ ರಶ್ಮಿಕಾ, ವಿಜಯ್ ತಮ್ಮ ಜೀವನವನ್ನು ಹೇಗೆ ಬದಲಿಸಿದರು ಎಂಬುದನ್ನು ವಿವರಿಸಿದ್ದಾರೆ.
“ನಿಜವಾದ ಪ್ರೀತಿ ಎಂದರೆ ಏನು ಮತ್ತು ಮನಸ್ಸಿನ ಶಾಂತಿ ಎಂದರೆ ಏನು ಎಂಬುದನ್ನು ನನಗೆ ಕಲಿಸಿದ ವ್ಯಕ್ತಿ ಇವರು. ದೊಡ್ಡ ಕನಸು ಕಾಣುವುದು ತಪ್ಪಲ್ಲ ಮತ್ತು ನನ್ನ ಸಾಮರ್ಥ್ಯಕ್ಕಿಂತಲೂ ಹೆಚ್ಚಿನದನ್ನು ಸಾಧಿಸಲು ನಾನು ಶಕ್ತಳು ಎಂದು ಪ್ರತಿದಿನ ನನಗೆ ನೆನಪಿಸುವ ಮನುಷ್ಯ ವಿಜಯ್,” ಎಂದು ರಶ್ಮಿಕಾ ಭಾವುಕರಾಗಿ ಬರೆದುಕೊಂಡಿದ್ದಾರೆ.
ಗೆಳೆಯರೊಂದಿಗೆ ಪ್ರವಾಸ ಮಾಡುವುದು ಬದುಕಿನ ಅತ್ಯಂತ ಸುಂದರ ಕ್ಷಣ ಎಂಬುದು ವಿಜಯ್ ಅವರಿಂದಲೇ ತಿಳಿಯಿತು ಎಂದಿರುವ ರಶ್ಮಿಕಾ, ತಾವು ಕಂಡ ಕನಸಿನ ಮಹಿಳೆಯಾಗಿ ಇಂದು ರೂಪಗೊಳ್ಳಲು ವಿಜಯ್ ಕಾರಣ ಎಂದು ಹೇಳಿದ್ದಾರೆ. “ನನ್ನ ಸಾಧನೆ, ನೋವು, ನಲಿವು ಮತ್ತು ಬದುಕಿನ ಪ್ರತಿಯೊಂದು ಘಟ್ಟಕ್ಕೂ ಈಗ ಅರ್ಥ ಸಿಕ್ಕಿದೆ. ಏಕೆಂದರೆ ಇದೆಲ್ಲವನ್ನೂ ಸಾಕ್ಷೀಕರಿಸಲು ನನ್ನ ಜೊತೆ ಈಗ ನೀನಿದ್ದೀಯ,” ಎಂದು ಬರೆದಿದ್ದಾರೆ.
ಇದನ್ನೂ ಓದಿ | ತಾಯಿಯ ಪ್ರೀತಿಗಾಗಿ ಹಾತೊರೆದ ಮರಿ ಕೋತಿಗೆ ಆಸರೆಯಾದ ‘ಗೊಂಬೆ’: ಐಕಿಯಾ ಗೊಂಬೆಗೆ ಡಿಮ್ಯಾಂಡೋ ಡಿಮ್ಯಾಂಡ್!
“ನಿನ್ನ ಹೆಂಡತಿ ಎನಿಸಿಕೊಳ್ಳಲು ಕಾತುರಳಾಗಿದ್ದೇನೆ”
“ವಿಜ್ಜು (Vijju), ನಿನ್ನ ಹೆಂಡತಿಯಾಗಲು ನಾನು ತುಂಬಾ ಅತೀವವಾಗಿ ಉತ್ಸುಕಳಾಗಿದ್ದೇನೆ. ನಿನ್ನ ಪತ್ನಿ ಎಂದು ಕರೆಸಿಕೊಳ್ಳುವುದು ನನಗೆ ಹೆಮ್ಮೆ. ಇನ್ನು ಮುಂದೆ ನಮ್ಮಿಬ್ಬರ ಜೀವನದ ಅತ್ಯಂತ ಸುಂದರ ಪಯಣ ಒಟ್ಟಾಗಿ ಆರಂಭವಾಗಲಿದೆ. ಐ ಲವ್ ಯೂ,” ಎಂದು ರಶ್ಮಿಕಾ ತಮ್ಮ ಸಂಭ್ರಮವನ್ನು ಹಂಚಿಕೊಂಡಿದ್ದಾರೆ.
ರಶ್ಮಿಕಾ ಈ ಪೋಸ್ಟ್ ಹಾಕುತ್ತಿದ್ದಂತೆಯೇ ಸೋಷಿಯಲ್ ಮೀಡಿಯಾದಲ್ಲಿ ಶುಭಾಶಯಗಳ ಮಹಾಪೂರವೇ ಹರಿದು ಬರುತ್ತಿದೆ. ‘ಗೀತ ಗೋವಿಂದಂ’ ಚಿತ್ರದ ಮೂಲಕ ಮೋಡಿ ಮಾಡಿದ್ದ ಈ ಜೋಡಿ ನಿಜ ಜೀವನದಲ್ಲೂ ಒಂದಾಗುತ್ತಿರುವುದು ಅಭಿಮಾನಿಗಳಿಗೆ ಹಬ್ಬದ ಸಂಭ್ರಮ ತಂದಿದೆ.
