ಬೊಲಿವಿಯಾದ ರಾಜಧಾನಿ ಲಾ ಪಾಜ್ ಸಮೀಪದ ಎಲ್ ಆಲ್ಟೊ (El Alto) ವಿಮಾನ ನಿಲ್ದಾಣದ ಬಳಿ ಶುಕ್ರವಾರ ಸಂಜೆ ಸಂಭವಿಸಿದ ಭೀಕರ ವಿಮಾನ ಅಪಘಾತದಲ್ಲಿ ಕನಿಷ್ಠ 15 ರಿಂದ 20 ಮಂದಿ ಮೃತಪಟ್ಟಿರುವ ದೃಢಪಟ್ಟಿದೆ. ಬೊಲಿವಿಯಾ ವಾಯುಪಡೆಗೆ ಸೇರಿದ ಸಿ-130 ಹರ್ಕ್ಯುಲಸ್ (C-130 Hercules) ಸರಕು ವಿಮಾನವು ಹೊಸದಾಗಿ ಮುದ್ರಿಸಿದ ಕರೆನ್ಸಿ ನೋಟುಗಳನ್ನು ಹೊತ್ತು ತರುತ್ತಿದ್ದಾಗ ಈ ದುರ್ಘಟನೆ ಸಂಭವಿಸಿದೆ.
ಶುಕ್ರವಾರ ಸಂಜೆ, ಸಾಂಟಾ ಕ್ರೂಜ್ ನಗರದಿಂದ ಲಾ ಪಾಜ್ಗೆ ಬರುತ್ತಿದ್ದ ಈ ವಿಮಾನವು, ಎಲ್ ಆಲ್ಟೊ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಇಳಿಯುವಾಗ ರನ್ವೇಯಿಂದ ಜಾರಿ, ನಿಯಂತ್ರಣ ತಪ್ಪಿ ಪಕ್ಕದ ಜನನಿಬಿಡ ಹೆದ್ದಾರಿಗೆ ನುಗ್ಗಿದೆ. ಈ ರಭಸಕ್ಕೆ ಹೆದ್ದಾರಿಯಲ್ಲಿ ಚಲಿಸುತ್ತಿದ್ದ ಕನಿಷ್ಠ 12ಕ್ಕೂ ಹೆಚ್ಚು ವಾಹನಗಳಿಗೆ ವಿಮಾನ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ತೀವ್ರತೆಗೆ ವಿಮಾನಕ್ಕೆ ಬೆಂಕಿ ಹೊತ್ತಿಕೊಂಡಿದ್ದು, ಸ್ಥಳದಲ್ಲಿ ಭೀಕರ ವಾತಾವರಣ ನಿರ್ಮಾಣವಾಗಿತ್ತು.
ಹಣದ ದೋಚಾಟ ಮತ್ತು ಅವ್ಯವಸ್ಥೆ:
ವಿಮಾನದಲ್ಲಿದ್ದ ಅಸಂಖ್ಯಾತ ನೋಟುಗಳು ಅಪಘಾತದ ರಭಸಕ್ಕೆ ರಸ್ತೆಯುದ್ದಕ್ಕೂ ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದವು. ಈ ದೃಶ್ಯ ಕಂಡ ಸ್ಥಳೀಯರು, ರಕ್ಷಣಾ ಕಾರ್ಯಕ್ಕೆ ಸಹಕರಿಸುವ ಬದಲು, ಆ ನೋಟುಗಳನ್ನು ಬಾಚಿಕೊಳ್ಳಲು ಮುಗಿಬಿದ್ದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಈ ಅಮಾನವೀಯ ವರ್ತನೆಯಿಂದ ರಕ್ಷಣಾ ಕಾರ್ಯಗಳಿಗೆ ಅಡ್ಡಿಯುಂಟಾಯಿತು. ಪರಿಸ್ಥಿತಿಯನ್ನು ನಿಯಂತ್ರಿಸಲು ಪೊಲೀಸರು ಅನಿವಾರ್ಯವಾಗಿ ಅಶ್ರುವಾಯು ಪ್ರಯೋಗಿಸಬೇಕಾಯಿತು.
ಇದನ್ನೂ ಓದಿ | ‘ಅಲ್ಪಾಯುಷಿ’ ಎಂದಿದ್ದ ಜ್ಯೋತಿಷಿ, ನೇಣಿಗೆ ಶರಣಾದ ಯುವತಿ
ಅಧಿಕಾರಿಗಳ ಸ್ಪಷ್ಟನೆ:
ಘಟನೆಯ ನಂತರ ಬೊಲಿವಿಯಾ ರಕ್ಷಣಾ ಸಚಿವಾಲಯವು ಒಂದು ಪ್ರಮುಖ ಎಚ್ಚರಿಕೆ ನೀಡಿದ್ದು, “ವಿಮಾನದಲ್ಲಿದ್ದ ನೋಟುಗಳಿಗೆ ಯಾವುದೇ ಕಾನೂನುಬದ್ಧ ಮೌಲ್ಯವಿಲ್ಲ (Serial number ಇಲ್ಲದ ನೋಟುಗಳು). ಇವು ಇನ್ನೂ ಚಲಾವಣೆಗೆ ಬಂದಿರಲಿಲ್ಲ, ಆದ್ದರಿಂದ ಇದನ್ನು ಕದಿಯುವುದು ಅಥವಾ ಬಳಸುವುದು ಅಪರಾಧ,” ಎಂದು ಸ್ಪಷ್ಟಪಡಿಸಿದೆ. ಅಪಘಾತಕ್ಕೆ ನಿಖರ ಕಾರಣ ಏನೆಂಬುದು ಇನ್ನೂ ತನಿಖೆಯಲ್ಲಿದೆ, ಆದರೆ ಪ್ರತಿಕೂಲ ಹವಾಮಾನವೇ ಇದಕ್ಕೆ ಕಾರಣವಿರಬಹುದು ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ.
